நாமக்கல் கவிஞர் 1888ஆம் ஆண்டு அக்டோபர் 19 அன்று பிறந்தார். இன்று 136ஆம் பிறந்த நாள். பொதுவாகக் கவிஞர் என்று அடையாளப்படுகிறார். ‘தமிழன் என்று சொல்லடா, தலைநிமிர்ந்து நில்லடா’, ‘கத்தியின்றி ரத்தமின்றி யுத்தமொன்று வருகுது’ முதலிய தொடர்கள் அவர் உருவாக்கியவை. இன்று வரைக்கும் பயன்பாட்டில் உள்ளன. எனினும்  கவிதைகளை விட அவரது உரைநடை நூல்கள் முக்கியமானவை. மலைக்கள்ளன், காணாமல் போன கல்யாணப் பெண் என நாவல்கள் எழுதியிருக்கிறார். திருக்குறள் பற்றியும் கம்பராமாயணம் பற்றியும் ஆய்வு நோக்கிலும் நயம் பாராட்டும் வகையிலும் சில நல்ல நூல்களை எழுதியுள்ளார். திருக்குறளுக்கு உரை வரைந்துள்ளார். உரை எழுதும் காலத்தில் அவர் செய்த ஆய்வுகளே திருக்குறள் பற்றிய நூல்களாக உருவாயின.